«Բարձունք» գիտակրթական-ռազմավարական կենտրոնում օգոստոսի 26-ին տեղի ունեցավ «ՄԻԱՍԻՆ» հասարակական կազմակերպության 1-ամյակին նվիրված միջոցառումը։ Ցերեկույթը վարեց «ՄԻԱՍԻՆ» ՀԿ-ի ծրագրերի խորհրդատու Սիրվարդ Համբարյանը:
«ՄԻԱՍԻՆ» ՀԿ-ի տեղեկացմամբ, միջոցառման ընթացքում ներկայացվեց կազմակերպության իրականացրած բոլոր ծրագրերը, հնչեցին շնորհավորական բազում խոսքեր։
Մեկ տարվա գործունեության մասին զեկույցով հանդես եկավ ՀԿ-ի նախագահ Գևորգ Չիչյանը՝ իր խոսքում շնորհակալություն հայտնելով հայաստանյան և սփյուռքյան գործընկերներին համագործակցության և վստահության համար:
Այնուհետև տեսասահիկի միջոցով «ՄԻԱՍԻՆ» ՀԿ-ի մեկ տարվա գործունեությունը ներկայացրեց ՀԿ-ի համահիմնադիր Լուսինե Պետրոսյանը։
Միջոցառման երաժշտական մասն ապահովեցին ազգագրական երգերի կատարող, «Առաքելություն Հայաստան» ՀԿ կենտրոնների երգի խմբավար, մանկապարտեզների եւ մանկական զարգացման կենտրոնների երգի ուսուցչուհի «Գոհար Հարությունյանը, Էջմիածնի Մակար Եկմալյանի անվան թիվ 1 երաժշտական դպրոցի ջութակի ուսուցչուհի Լուսինե Ներսիսյանը, Երևանի Կոմիտասի անվան պետական Կոնսերվատորիայի ժողովրդական երգեցողության բաժնի ուսանողուհի Ռաիսա Մելքումյանը։
Միամյա գործունեության առիթով Օրհնության և գնահատանքի գիր էր հղել Ռումինիայի Հայոց թեմի առաջնորդ, Բուլղարիայի Հայոց թեմի Առաջնորդական տեղապահ, Բալկանյան երկրների Հայրապետական պատվիրակ Գերաշնորհ Տեր Տաթև եպիսկոպոս Հակոբյանը, շնորհավորական հոլովակներով հանդես եկան ՀՀ վաստակավոր արտիստ, երգիչ Արսեն Գրիգորյանը (Մրո), «WiRED International» միջազգային առողջապահական կազմակերպության հայաստանյան ներկայացուցիչ, ավստրիահայ հասարակական գործիչ Սեբուհ Բաղդոյանը, ՀՕՄ-ի Վառնայի «Արաքս» մասնաճյուղը ատենապետուհի Շողիկ Սիմոնյանը, Մյունխենի հայ֊-գերմանական «Անուշ» պարի և մշակույթի կենտրոնի հիմնադիր տնօրեն Անուշ Չախալյանը, Դոնի Ռոստովի «Искры Армении» պարի անսամբլի ղեկավար Արմինե Օհանյանը։
«ՄԻԱՍԻՆ» ՀԿ-ի միամյակի միջոցառմանը ներկա էին բոլոր ծրագրերում համագործակցած կազմակերպությունների ներկայացուցիչներ, հատուկ հյուրեր, ծրագրերի մասնակիցներ։
«Մեր տունը» սոցիալական ՀԿ-ի փոխտնօրեն Մարիամ Կիրակոսյանն իր խոսքում ջերմորեն շնորհավորեց ՀԿ-ի աշխատակազմին միամյա գործունեության առիթով՝ հանգամանալիորեն անդրադառնլով միասին իրականացրած ծրագրերին:
ՀՕՄ Արվեստի ատենապետուհի Լիզա Մինասյանն իր շնորհավորական խոսքում նույնպես կարևորեց «ՄԻԱՍԻՆ»-ի գործուենությունը՝ հույս հայտնելով, որ արդեն երկուստեք սկիզբ առած արդյունավետ փոխգործակցությունը կլինի շարունակական:
Միջոցառումն ամփոփվեց շնորհակալագրերի և պատվոգրերի հանդիսավոր հանձմամբ։
