Արևելահայերեն ու արեւմտահայերեն երգերի գեղեցիկ կատարումներով երաժշտասերներին ծանոթ ստամբուլահայ երգչուհի Սիպիլը և երկար տարիներ ի վեր Սև ծովի արևելյան շրջանների երաժշտությունն ուսումնասիրող համշենցի երգչուհի Այշենուր Քոլիվարը միասնաբար կատարեցին «Լուսի հատիկ» երգը։ Այս երգն արդեն հրապարակված է թվային հարթակներում։
«Լուսի հատիկ» երգի երաժշտության հեղինակն է Արի Հերկելը։ Նրան է պատկանում նաև երգի գործիքավորումը։ Երգի արևմտահայերեն խոսքերը գրել է լիբանանահայ բանաստեղծ Աշոտ Բագրատունին, իսկ Համշենի բարբառով խոսքերը գրել է համշենցի մտավորական Մահիր Օզքանը։
Երգի տեսահոլովակը պատրաստվել Օզքան Աքսուլարի ղեկավարությամբ։ Արեւմտահայերենով ու Համշենի բարբառով «Լուսի հատիկ» երգը մարդկությանն ուղղված բարության կոչ է։ Այս ստեղծագործության արտադրությունը ստանձնել է «Քալան» երաժշտական ընկերության YouTube-ի ալիքը։ Երգն ունի համապատասխան անգլերեն, արեւելահայերէն և թուրքերեն թարգմանված ենթագրեր, ինչպես նաև տեսահոլովակ ու ժեսթերի լեզվով թարգմանություն։
Այս երգը, միավորելով նույն լեզվի երկու տարբեր դրսևորումներ, ունկնդիրների ուշադրությունը հրավիրում է այն հանգամանքի վրա, որ արևմտահայերենն ու Համշենի բարբառը, չնայած նույն տարածքում ապրելով և իրարից հեռու մնալով հանդերձ, ինչքան հարազատ են միմյանց։ Երգը նաև հիշեցնում է, որ այս երկու լեզուներն էլ գնահատվում են որպես անհետացման վտանգի տակ գտնվող լեզուներ։
Սիպիլն իր հայկական ժողովրդական երաժշտության երգարվեստով արդեն միջազգային ճանաչում է վայելում։ Այշենուր Քոլիվարը յուրօրինակ կատարումներով մշակում է Սև ծովի արևելյան շրջանների բազմամշակութային արվեստը։
Մշակույթի այս երկու գործիչները «Լուսի հատիկ» երգով միասնաբար հույսի ձայն են փոխանցում` միաժամանակ գարնան զարթոնքը խառնելով Վարդավառի խանդավառությանը։