ՀՀ ԿԳՄՍ նախարարության աջակցությամբ, «Արհեստագործների միություն» մշակութային հիմնադրամի նախաձեռնությամբ և «Տերյան մշակութային կենտրոն» ՀԿ-ի օժանդակությամբ «Մեգերյան կարպետ» մշակութային համալիրում նոյեմբերի 19, 20-ին տեղի ունեցավ «Իմ ձեռագործ Հայաստանը թանգարաններում» խորագրով փառատոնը:
Փառատոնի նպատակն էր աջակցել Հայաստանի թանգարաններին, հուշանվերային արտադրանքն ընդունել որպես թանգարանային գործունեության հանրահռչակման ժամանակակից միջոց, ինչպես նաև աջակցել ավանդական արհեստների վերականգնման գործընթացին:
Երկօրյա փառատոնը միավորել էր Հայաստանի 7 մարզի (Սյունիք, Վայոց ձոր, Լոռի, Տավուշ, Շիրակ, Արագածոտն, Գեղարքունիքի) տարբեր համայնքների, ինչպես նաև Երևանի և Արցախի 50-ից ավելի արհեստագործ վարպետների:
Փառատոնում ներկայացված էին ավանդական արհեստները, այդ թվում՝ փայտի և քարի փորագրություն, տեքստիլ, ասեղնագործություն, կարպետագործություն, կավագործություն, մետաղագործություն և այլն:
Այցելուները հնարավորություն են ունեցել մասնակցելու վարպետաց դասերին և ձեռք բերելու արհեստագործների վերջին հավաքածուները։
Բացման արարողությանը ներկա են եղել ՀՀ ԿԳՄՍ նախարարության մշակութային ժառանգության և ժողովրդական արհեստների վարչության պետ Աստղիկ Մարաբյանը, ԱՄՆ Միջազգային զարգացման գործակալության (ՄԶԳ/USAID) հայաստանյան առաքելության տնօրեն Ջոն Ալելոն, ԱՄՆ ՄԶԳ ծրագրերի կառավարիչ Հայկանուշ Բագրատունյանը, «ՆՈՎԻԿԱ» միջազգային առցանց հարթակի նախագահ Արմենիա Ներսեսյանը, ինչպես նաև մշակույթի ոլորտի անվանի ներկայացուցիչներ, հյուրեր միջազգային և տեղական այլ կառույցներից, մշակութասեր հանրություն:
Ողջույնի խոսքով հանդես է եկել ԱՄՆ Միջազգային զարգացման գործակալության հայաստանյան առաքելության տնօրեն Ջոն Ալելոն: Նա շնորհավորել է ներկաներին: Նշել, որ սա մշակութային կյանքի նշանակալի իրադարձություն է: Շնորհակալություն է հայտնել կազմակերպիչներին փառատոնի իրականացման գործում ներդրած ջանքերի համար և ավելացրել, որ թեպետ ավարտվել է «Իմ Հայաստան» ծրագիրը, սակայն ուրախ է, որ այլ հնարավորություններ ստեղծվեցին և ծրագրի շարունակությունն ապահովվեց՝ շնորհիվ Լիլիթ Մելիքյանի:
«ՆՈՎԻԿԱ» միջազգային առցանց հարթակի նախագահ Արմենիա Ներսեսյանը նշել է, թե որքան ուրախ է միջոցառմանը մասնակցելու համար: Անթաքույց հիացմունքով խոսել է փառատոնի դերի մասին և գնահատել արհեստագործ վարպետների հետ համագործակցային հարաբերությունները:
Աստղիկ Մարաբյանը կարևորել է Հայաստանում արհեստագործության պահպանությունը՝ դիտարկելով դրա կենսունակության և փոխանցման ապահովումը՝ որպես ոչ նյութական մշակութային ժառանգության պահպանության և համայնքների կայուն զարգացման գործոն:
«Իմ ձեռագործ Հայաստանը թանգարաններում» փառատոնը հարթակ էր, որն ուղղված էր երկրի գյուղական համայնքների զարգացմանը, ստեղծագործական տարբեր համայնքների միջև կապի ամրապնդմանը և միևնույն բնագավառի մարդկանց շփման հնարավորությանն ու հետագա համագործակցությանը:
«Ծրագրի արդյունավետ իրականացման գործում շնորհակալություն ենք հայտնում Լիլիթ Մելիքյանին, Աշխեն Խուդավերդյանին և բոլոր թիմակիցներին: Հատուկ շնորհակալություն ենք հայտնում մեր գործընկերներին` «Մեգերյան կարպետ» մշակութային համալիրի տնօրինությանը և աշխատակազմին, «Բեկոր» ազգագրական պարի խմբին, ՀՀ վաստակավոր արտիստ Հասմիկ Հարությունյանին և կամավորներին»,- այս մասին նշված է «Տերյան մշակութային կենտրոն»-ի տարածած հաղորդագրության մեջ:
