Բնակարանի, գրասենյակի, բիզնեսի համար նախատեսված տարածքները կարող են նկատելիորեն արդյունավետ օգտագործվել, իսկ միջավայրն առավել արտահայտիչ ու ներդաշնակ կարող է լինել, եթե այն գծագրված ու մշակված է մասնագետի կողմից։
Ինքնուրույն, առանց դիզայների օգնության, վերանորոգում իրականացնել, իհարկե, հնարավոր է։ Սակայն դիզայների դիմելը ոչ միայն թրենդ է, այլև անհրաժեշտություն։ Միայն այս դեպքում է հնարավոր ապահովել պրոցեսների գրագետ պլանավորում, իրականացում ու վերահսկողություն։
Զրուցել ենք «Ռեֆորմ» դիզայն ստուդիոյի հիմնադիր Օֆելյա Սաֆարյանի հետ։
-Խնդրում ենք ներկայացնել «Ռեֆորմ» ընկերությունը։ Ի՞նչ է այն իրենից ներկայացնում։ Ի՞նչ ծառայություններ է հնարավոր ստանալ։
–«Reform» ընկերությունը ինտերիեր դիզայն-ստուդիո է։ Մենք մատուցում ենք ինտերիեր դիզայնի վերաբերյալ ծառայությունների լայն շրջանակ։ Մենք չափագրում ենք տարածքը, մշակում հատակագծերի եռաչափ դիզայն, մշակում ենք տեխնիկական գծագրերը և հետևում ենք շինարարությանը։
-Ովքե՞ր են Ձեր գործընկերները։ Դրանք անհատներ են, թե ունեք նաև կորպորատիվ գործընկերներ։
-Մենք համագործակցում ենք թե՛ անհատների, թե՛ կազմակերպությունների հետ։ Այս առումով չունենք հատուկ սկզբունք, և կարող ենք աշխատել ցանկացած տեսակի հաճախորդի հետ։
-Ի՞նչ նշանակություն եք տալիս նաև աշխարհագրությանը։ Ո՞ր երկրների հետ ունեք համագործակցություններ։
-«Reform»-ը իր գործունեությունը ծավալում է ոչ միայն Հայաստանում, այլև երկրի սահմաններից դուրս։ Ընդ որում, բավական մեծ է մեր գործունեության աշխարհագրությունը․ Ամերիկայի միացյալ նահանգներ, Ավստրալիա, Անգլիա, Գերմանիա, Սաուդյան Արաբիա, Բահրեյն։ Սրանք այն երկրներն են, որտեղ արդեն իսկ ունենք աշխատանքներ, ինչպես նաև ընթացիկ նախագծեր։
-Խնդրում ենք պատմել՝ ինչ պրոցես է անցնում հաճախորդը Ձեզ հետ համագործակցելիս։
-Սկզբում հանդիպում ենք հաճախորդին՝ քննարկելու բոլոր մանրուքները՝ ոճը, նախընտրությունները։ Այնուհետև ավելի խորքային հարցաշարով ենք տեղեկանում հաճախորդի պահանջների մասին ու ստացված տեղեկությունների հիման վրա հասկանում ենք, թե ինչ արդյունք է ուզում ստանալ նա։ Աշխատանքի առաջին փուլը չափագրումն է, որից հետո համաձայնեցվում են հատակագծի տարբերակները, և սկսվում է աշխատանքը դիզայնի ուղղությամբ։ Հաճախորդը ստանում է բարձր որակի և իրականությանը համապատասխանող ռենդեր, որը հնարավորություն է տալիս լիովին պատկերացնել, թե արդյունքում ինչպիսի միջավայր է ստացվելու։ Հաստատումը ստանալուց հետո հաճախորդի հետ այցելում ենք համապատասխան խանութներ՝ ընտրելու նյութերը։ Շինարարության ընթացքում վարպետներին տրամադրվում են տեխնիկական գծագրերը։ Պարբերաբար հանդիպումներ են լինում վարպետների հետ՝ քննարկելու և հսկելու պրոցեսը։ Սա կարևոր է, որպեսզի ապահովենք գծագրերի հետ համապատասխանությունը։
Հաճախորդի հետ մեր համագործակցությունն ավարտվում է այն ժամանակ, երբ ինտերիերը, գծագրերին լիովին համապատասխան կերպով, պատրաստ է շահագործման։
-Աշխատանքային ի՞նչ հիմնական սկզբունքներ ունեք։
-Մեր աշխատանքում սկզբունքային է որակն ու համապատասխանությունը։ Եվ ընդհանուր առմամբ աշխատում ենք այն հաճախորդների հետ, որոնց ոճը համընկնում է մեր ստուդիոյի ոճի հետ։
-Ինչպե՞ս եք ընտրում ոճն ու մոտեցումները՝ արդյոք էսքիզներն արվում են Ձեր նախասիրություններով, թե դրանք հաճախորդի ցանկության հիման վրա են։
-Հիմնականում մեր հաճախորդները, տեսնելով մեր արդեն իսկ իրականացրած աշխատանքները, ցանկություն են հայտնում ունենալ նմանատիպ ոճի միջավայր։ Սակայն, կարևոր է, որ մեր հաճախորդներից յուրաքանչյուրին ցուցաբերվում է անհատական մոտեցում՝ հիմնված իրենց պատկերացումների, նախասիրությունների և անհատականության վրա։
-Խնդրում ենք պատմել նաև Ձեր անցած ճանապարհի և գործունեության մասին։
-Ես սովորել եմ Ճարտարապետության և շինարարության ազգային համալսարանում Դիզայնի ֆակուլտետում։ Ավարտելով՝ աշխատել եմ հայաստանյան մի քանի ճարտարապետական ստուդիոներում։ Այս ամբողջ ընթացքում անցել եմ միջազգային մաստեր-կլասսեր՝ ծանոթանալով համաշխարհային մոտեցումներին, թրենդերին, անընդհատ լինելով զարգացումների կենտրոնում։ Եվ համապատասխան փորձի ձեռքբերումից հետո միայն որոշեցի ստեղծել Reform-ը։
Ընդհանուր առմամբ մեծ նշանակություն եմ տալիս շարունակական զարգացմանն ու կրթությանը։ Կարծում եմ, որ դրա բացակայության դեպքում մասնագետը ոչ միայն նույն տեղում կմնա, այլև հետքայլ կանի։ Մինչդեռ ամբողջ աշխարհը շատ արագ տեմպերով է զարգանում։ Մեր մասնագիտությունն էլ ենթադրում է միշտ լինել նոր, ժամանակակից, թարմ, չէ՞ որ մենք տևական արդյունքով աշխատանք ենք իրականացնում։