Բժիշկները հաճախ են խոսում կանխարգելիչ հետազոտությունների մասին։ Միայն այսպես է հնարավոր վաղ հայտնաբերել մեր օրգան-համակարգերում առաջացող փոփոխությունները և արագ միջոցներ ձեռնարկել դրանք բուժելու ուղղությամբ։ Իսկ ինչպե՞ս պատրաստվել այնքան տարածված ուլտրաձայնային հետազոտություններին՝ կան արդյոք սկզբունքներ, որ պետք է պահպանել։ Զրուցում ենք բժիշկ-սոնոգրաֆիստ Արմինե Միսակյանի հետ։
-Կան արդյոք հատուկ նախապատրաստման պայմաններ՝ ուլտրաձայնային հետազոտության դիմելուց առաջ։
-ՈՒՁ հետազոտությանը պատրաստվելու համար կան որոշակի նախապայմաններ և կախված տվյալ օրգանի հետազոտությունից, դրանք տարբեր են։ Պետք է նշել, որ վահանաձև գեղձի կրծքագեղձի պարագայում հատուկ նախապատրաստություններ պետք չեն։ Իհարկե կրծքագեղձերի պարագայում անպայման հաշվի է առնվում դաշտանային ցիկլի ֆազան։ Ցանկալի է կրծքագեղձերը հետազոտել դաշտանային ցիկլի առաջին փուլում։
Իսկ որովայնի խոռոչի օրգանների դեպքում ցանկալի է հետազոտությանը ներկայանալ դատարկ ստամոքսով։ Փոքր կոնքի օրգանները հետազոտելու պարագայում պետք է ներկայանալ լիքը միզապարկով, ցանկալի է սոնոգրաֆիայից առաջ չօգտագործել գազ առաջացնող սնունդ և ըմպելիքներ, որպեսզի աղիների լրացուցիչ գազային ստվերը չխանգարի որովայնի խոռոչի օրգանների վիզուալիզացիային։
-Բժիշկները հաճախ են խոսում կանխարգելիչ հետազոտությունների մասին։ Արդյոք հատուկ ուղեգրում պետք է, թե մարդը պարզապես կարող է գալ հետազոտության։
–ՈՒՁՀ անցնելու համար չկան հատուկ ուղեգրման պայմաններ և մարդը կարող է անցնել սոնոգրաֆիկ հետազոտություն՝ իր իսկ նախաձերնությամբ, որը կարող է լինել ինչպես պրոֆիլակտիկ, այնպես էլ որևէ գանգատի հիման վրա։ Մեծամասամբ դեպքերում պացիենտներին ուղղորդում են մասնագետները՝ գանգատի հիման վրա։
-Հաճախ մարդիկ զգուշանում են ուլտրաձայնային հետազոտություն անցնելուց՝ մատնանշելով, որ այս հետազոտութոյւնը կարող է վտանգավոր ճառագայթներով վնասել։ Որքանո՞վ է անվտանգ այն։
-ՈՒՁՀ-ն ինվազիվ մեթոդ չէ, չունի վնասակար ազդեցություն, չունի ճառագայթային ազդեցություն, գրեթե չունի հակացուցում։ Այն հանգամանքը, որ ՈՒՁՀ ցուցված է հղիության առաջին իսկ շաբաթից մինչև ծննդաբերություն, արդեն իսկ վկայում է անվնաս լինելու և բարձր անվտանգության մասին։ Այն պարզապես ձայնային ալիքի միջոցով փոխանցվող պատկերի վերարտադրումն է էկրանի վրա, որով կարողանում ենք տեսնել և գնահատել մարդու օրգան-համակարգերը։