Արգենտինայի Կորդոբա քաղաքի Օրենսդիր մարմնում տեղի է ունեցել արգենտինաբնակ երաժիշտ Գագիկ Գասպարյանի մեծարման արարողությունը: Ինչպես miasin.am-ին հայտնում է Գագիկ Գասպարյանը, Օրենսդիր մարմինն իրեն նման բարձր գնահատանքին է արժանացրել՝ հաշվի առնելով վերջինիս տարիների բազմաբեղուն գործունեությունն ու գործադրած ջանքերը՝ դուդուկի միջոցով հայկական մշակույթն օտար շրջանակներում տարածելու և այն որպես համամարդկային ժառանգություն ներկայացնելու գործում:
Օրենսդիր մարմինը կարևորել է նաև Գագիկ Գասպարյանի կրթական գործունեությունը։ Վերջինս երաժիշտներ է պատրաստում աշխարհի տարբեր երկրների երիտասարդ կատարողներից։
«Որպես մշակութային դեսպան՝ մենք կարևորում ենք նրա աշխատանքը երաժշտության և «Համերգներ հանուն խաղաղության» միջազգային շրջագայության միջոցով։ Վերջինս նպաստում է ժողովուրդների միջև միասնության ու փոխըմբռնման հաստատմանը։ Այդ շրջագայությունների ընթացքում հատելով ամենատարբեր սահմաններ՝ բազմաթիվ սերունդների փոխանցում է մշակութային և երաժշտական հիմնարար ժառանգություն»,-նշված է գնահատագրում:
