«Միասին» ՀԿ-ի և «WiRED International» միջազգային առողջապահական կազմակերպության համագործակցության շրջանակներում մարտի 9-ին Էջմիածնի «Մեր տունը» սոցիալական հասարակական կազմակերպությունում տեղի ունեցավ «Առողջությունը՝ բարեկեցության գրավական. WiRED» խորագրով բաց սեմինար:
Օրվա բանախոսը Վ.Ա. Ֆանարջյանի անվան Ուռուցքաբանության ազգային կենտրոնի բժիշկ-օրդինատոր, Արմավիրի Շտապ և անհետաձգելի բուժօգնության հերթապահ բժիշկ Անի Մնացականյանն էր, որն անդրադարձավ Հայաստանում առավել տարածված հիվանդություններից՝ զարկերակային գերճնշմանը, ասթմային, վահանաձև գեղձի և օնկոլոգիական հիվանդություններին՝ ներկայացնելով կազմակերպության մշակած և հայերեն թարգմանված մոդուլները:
Բաց սեմինարի հրավիրյալների թվում էին բժիշկներ, մանկավարժներ, աշակերտներ, ուսանողներ, համայքային աշխատողներ, և այլք, որոնք իրենց հուզող հարցերը հղեցին բանախոսին։ Ներկաների մտահոգությունները հիմնականում վերաբերում էին օնկոլոգիական հիվանդություններին։
«Մեր տունը» ՀԿ-ի փոխտնօրեն Մարիամ Կիրակոսյանը, ողջունելով հյուրերին, անդրադարձավ ՀԿ-ի ստեղծման պատմությանը, անցած ուղուն և իրականացրած ծրագրերին:
«WiRED International» միջազգային առողջապահական կազմակերպության հայաստանյան ներկայացուցիչ, ավստրիահայ հասարակական գործիչ Սեպուհ Բաղդոյանը խոսեց առողջապահական կազմակերության առաքելություն մասին, ներկայացրեց այն ծրագրերը, որոնք իրականացվել են ՀՀ տարբեր մարզերում։
«Մենք կարևորում ենք առողջ և կիրթ հասարակություն ունենալը և ցանկանում ենք հնարավորինս շատ մարդկանց ընդգրկել հանրային իրազեկման առողջապահապան այս արշավներին, որոնք նպատակ ունեն հասարակության լայն շերտերին բժշկական գիտելիքներ հաղորդել, օգնել առավել տեղեկացված լինել»,-նշեց Սեպուհ Բաղդոյանը՝ հորդորելով հատկապես երիտասարդներին մասնակիցը դառնալու հանրային իրազեկման այս նախաձեռնություններին:
«DiasporArm» ՀԿ-ի հայաստանյան ներկայացուցիչ Անի Հովհաննիսյանն էլ անդրադարձավ նմանօրինակ միջոցառումների կարևորությանը և պատրաստակամություն հայտնեց հետագայում օժանդակել կազմակերպչական աշխատանքներին:
Սեմինարի ավարտին «Միասին» ՀԿ-ի նախագահ Գևորգ Չիչյանը «Միասին» ՀԿ-ի և Սեպուհ Բաղդոյանի կողմից շնորհակալագիր հանձնեց Անի Մնացականյանին՝ համագործակցության համար:
«WiRED International» միջազգային առողջապահական կազմակերպությունը 1997 թվականից զարգացող երկրներում նպաստում է բժշկական և առողջապահական կրթության բարելավմանը: 2012 թվականից ընկերությունը գործունեություն է ծավալում նաև Հայաստանում՝ համագործակցելով քաղաքացիական հասարակության կառույցների հետ:
