ՀՀ սփյուռքի հիմնադիր նախարար, իրավաբանական գիտությունների դոկտոր, պրոֆեսոր Հրանուշ Հակոբյանն ահազանգում է Երեւանում տեղի ունեցած վանդալիզմի մասին:
«Երբեւէ չէի պատկերացնի, որ մեր հերոս, հայրենիքի համար իրենց կյանքը զոհած քաջորդիների կողքին կարող են լինել նման բարբարոսներ, ովքեր տասը տարի առաջ Երեւանում կառուցված Բարերարների ճեմուղին կարող են ավերել, կարող են ջարդել, գողանալ ազգիս մեծերի կիսանդրիները։
Վանդալիզմը թուրքի ձեռագիրն է, ով այսօր Արցախի հուշարձաններն ու սրբատեղիներն է պղծում։ Հայն արարող է, բայց ոչ ավերող։ Վանդալները հայեր չեն․․․ Նրանք ոճրագործներ են։
Տարիներ շարունակ Բարերարների ճեմուղին ոչ միայն հաճելի զբոսավայր էր, այլեւ ուխտատեղի էր դարձել, որտեղ հայրենասիրության, ազգասիրության, բարության եւ մարդասիրության անմոռանալի դասեր էին ստանում մեր դպրոցականները։
Երեխաները հիանում էին Մանթաշյանցի եւ Արամյանցի վառ կերպարով, նրանց գործարար տաղանդով ու բարեգործական ձեռնարկներով, Գալուստ Գյուլբենկյանի դիվանագիտական բացառիկ կարողություններով եւ նավթարդյունաբերության ոլորտում արձանագրած ձեռքբերումներով։
Լսում էին Ալեք Մանուկյանի՝ հայապահպանությանը միտված ծրագրերի եւ աշխարհատարած գործերի մասին, ծանոթանում էին Լազարյան եղբայրների գործունեությանը, պետությանը մատուցած ծառայություններին, հայ-ռուսական բարեկամական կապերի ամրապնդմանն ուղղված ահռելի ջանքերին։
Աշակերտները ճեմուղուց հեռանում էին ազգի նվիրյալ, հասարակական-քաղաքական գործիչ, մեծանուն բարերար, Հայկական Բարեգործական Ընդհանուր Միության հիմնադիր Պողոս Նուբարի հսկայածավալ աշխատանքների մասին պատկերացում կազմելով։
Որքան էլ փորձեն վնասել Բարերարների ճեմուղին եւ ջնջել հայ ժողովրդի պատմական հիշողությունը, միեւնույն է՝ մեր Մեծերն իրենց հաստատուն տեղն ու դերն ունեն հայոց պատմության մեջ։ Հայ բարերարներն անմահ են իրենց ազգօգուտ գործերով ու անուրանալի վաստակով, իսկ հայ երիտասարդ սերունդը կշարունակի դաստիարակվել նրանց օրինակով, մեծանալ ազգային արժեքներով։
Ի հեճուկս չարի ու թշնամյաց, անմահությունը բազկատարած իր գիրկն է առել հայ ժողովրդի մեծանուն զավակներին և դարձրել նրանց հավերժի ճամփորդ», – ընդգծում է Հ․Հակոբյանը։
Հիշեցնենք, որ Երևանի հուշարձանների պահպանության ֆեյսբուքյան էջի փոխանցմամբ, մարտի 7-ին մարզային ծառայության կողմից կատարված ստուգայցի ժամանակ հայտնաբերվել է, որ անհայտ անձանց կողմից «ՀԱՅ ԲԱՐԵՐԱՐՆԵՐԻ ՃԵՄՈՒՂԻ» հուշահամալիրից գողացվել են բոլոր հուշարձանների մետաղյա պատկերները:
