Բուլղարիայի Պլովդիվ քաղաքում հունիսի 3-ին մեկնարկեց «Բարև, Հայաստան» 6-րդ միջազգային ավանդական փառատոնը, որին մասնակցում են Բուլղարիայի, Ավստրիայի, Կիպրոսի և Հունաստանի հայկական համայնքներում գործող պարախմբեր, երգչախմբեր և անհատ կատարողներ։
Ինչպես տեղեկացնում է miasin.am-ը, փառատոնի հիմնական կազմակերպիչ «Արաքս» հիմնադրամի կողմից պատրաստված ընթրիքի ժամանակ շուրջ 400 մասնակիցներ համախմբվել են Պլովդիվի «Սուրբ Գևորգ» հայկական եկեղեցու բակում՝ տոնախմբելու համար հայկական մշակութային կարևոր իրադարձություններից մեկը։
Փառատոնին Բուլղարիայից մասնակցում են Պլովդիվի, Սոֆիայի, Ռուսեյի, Վառնայի և Բուրգասի հայ համայնքներում գործող պարախմբեր, երգչախմբեր և անհատ կատարողներ։
«Բարև, Հայաստան» փառատոնի բացման արարողությանը ներկա է եղել նաև Ռումինիայի Հայոց թեմի առաջնորդ և Բուլղարիայի հայոց թեմի առաջնորդական տեղապահ Տեր Տաթև եպիսկոպոս Հակոբյանը:
Տերունական աղոթքից հետո Սրբազան Հայրն իր օրհնության խոսքում շնորհակալություն է հայտնել «Արաքս» հիմնադրամի աշխատակիցներին, Պլովդիվի Սբ․Գևորգ եկեղեցու հոգևոր հովիվ Արժանապատիվ Տեր Հրաչ քհն․Մուրադյանին և բոլոր կազմակերպիչներին՝ փառատոնի կայացման գործում ներդրած գնահատելի ջանքերի համար։
Տաթև Սրբազանը նաև ողջունել է Պլովդիվի քաղաքային իշխանություններին՝ փառատոնն իրենց ներկայությամբ պատվելու համար։
Ապա Սրբազան Հայրն, իր խոսքն ուղղելով Պլովդիվում տարբեր հայ համայնքներից համախմբված երիտասարդներին, ասել է․«Սիրելինե՛ր, մշակույթը մեր դեմքն է, ազգերը ապրում և հարատևում են իրենց մշակույթով, իսկ մենք, ինչպես գիտենք, բազմադարյա հարուստ մշակույթ և ազգային բարձր արժեքներ կերտած ժողովուրդ ենք, որոնցով հազարամյակներ շարունակ ներկայանում ենք աշխարհի տարբեր ծագերում։ Հայերը հավերժության, հաղթանակի և հաղթության ժողովուրդ են, և մենք պետք է ամենուր ապրենք և արարենք մեր մշակութային ժառանգություններով»:
Տաթև Սրբազանը ընդգծել է նաև, որ աշխարհասփյուռ հայորդիները պետք է նախանձախնդիր լինեն պահպանելու ազգային ինքնությունն ու դիմագիծը, համախմբվեն Հայ Առաքելական եկեղեցու շուրջ, հետամուտ լինեն Հայոց ցեղասպանության արդարացի լուծման համար, ինչպես նաև զարգացնեն Հայաստանն ու Արցախը։
«Երբե՛ք չընկրկեք, քա՛ջ եղեք, քանի որ հայ ազգը քաջությամբ կարողացել է նոր արշալույսներ բացել իր կյանքում: Հայն այլևս իրավունքն չունի վհատվելու․ մենք անկոտրում ոգով կերտելու ենք մեր ապագան և զորանալու ենք։
Հայ ժողովուրդ աշխարհի աղն ու համն է, և մենք հավերժորեն ապրելու ենք այս աշխարհում»,-եզրափակիչ խոսքում նշել է Տաթև Սրբազանը:
