Սեպտեմբեր 27-ից ի վեր Ադրբեջանը՝ Թուրքիայի և վարձկան ահաբեկիչների մասնակցությամբ, սկսել է ռազմական գործողություններն ընդդեմ Արցախի և Հայաստանի Հանրապետության։ Մեզ ոչնչացնելու ակնկալիքները գնալով հօդս են ցնդում, քանի որ յուրաքանչյուր զոհը մեզ կրկնապատիկ միացնում և հզորացնում է։
Աշխարհասփյուռ հայությունը մեկ բռունցք է դարձել:
Ավստրալիայի Մելբուռն քաղաքի հայերն անմասն չէին կարող մնալ այդ ամենից։ Չնայած Մելբուռնում կորոնավիրուսային հիվանդությամբ պայմանավորված արգելափակումներին, այնուամենայնիվ, Հայրենական պատերազմի առաջին օրից, մելբուռնահայությունը փորձում է հնարավորինս աջակցել մեր հայրենիքին։ Փոքր և միջին գործատերերը իրենց հոկտեմբեր ամսվա ողջ շահույթը նվիրելու են «Հայաստան» համահայկական հիմնադրամին, ոմանք նաև հավելյալ ժամանակավոր աշխատանք են գտել, որի եկամուտը նույնպես փոխանցում են Հայաստանին։ Շատերն էլ դրոշներ և եռագույնով զարդեր են պատրաստում, և ամբողջ շահույթը անմիջապես փոխանցում վերոհիշյալ հիմնադրամին։
Հարկ է նշել, որ մինչ այս պահը մելբուռնահայությունը մոտավորապես 350. 000 ավստրալիական դոլար է փոխանցել համահայկական հիմնադրամին։
Այս ընթացքում Մելբուռնում տեղի ունեցավ նաև քայլարշավ, որի մասնակիցները կարճ վիդեոներ/նկարներ տարածեցին սոց. ցանցերում #WalkForArtsakh հեշթեգով՝ մարդկանց քաջալերելով մասնակցել դրամահավաքին, որի շնորհիվ մոտավորապես 60. 000 ավստարիալական դոլար հավաքվեց և փոխանցվեց համահայկական հիմնադրամին։
Մելբուռնի տարբեր թաղամասերում և արվարձաններում երիտասարդները Արցախում ընթացող պատերազմի մասին թռուցիկներ են բաժանոմ՝ իրազեկվածության մակարդակը բարձրացնելու համար։
Այգ Պետրոսյան-Հակոբյան
miasin.am-ի թղթակից, Ավստրալիա
