Երէկ` երկուշաբթի, 15 փետրուար 2021-ին, Հայաստանի Ազգային գրադարանի եւ Լիբանանի «Ազդակ» օրաթերթի խմբագրակազմին միջեւ կնքուեցաւ փոխըմբռնման յուշագիր` համագործակցութեան լայն շրջանակի ապահովման, միացեալ ցուցադրութիւններու եւ համաժողովներու կազմակերպման, մամուլի թուային պատճէններու փոխանակման, մասնագէտներու փոխադարձ այցելութիւններու, թուայնացման միացեալ ծրագիրներու իրականացման, «Ազդակ»-ի մատենագիտութեան կազմութեան, «Հայկական շարունակական հրատարակութիւններ» շտեմարանի ձեւաւորման աշխատանքներուն մէջ «Ազդակ»-ի խմբագրակազմի ներգրաւման հարցերուն շուրջ:
Յուշագիրը ստորագրելէ ետք Հայաստանի ազգային գրադարանի տնօրէն Աննա Չուլեան նշեց, որ «Ազդակ»-ի հետ համագործակցութիւնը գրադարանը սկսած է 6 տարի առաջ, եւ յուշագիրի ստորագրութեան նպատակն է համագործակցութեան տալ պաշտօնական բնոյթ: Ազգային գրադարանին մէջ արդէն կը տարուին օրաթերթի մատենագիտութեան կազմութեան աշխատանքները, եւ կը նախատեսուի 2027-ին` «Ազդակ»-ի 100-ամեայ յոբելեանին, հրատարակել զայն: Աննա Չուլեանի կարծիքով` ասիկա նախադէպ կը հանդիսանայ սփիւռքահայ մամուլը Ազգային գրադարան բերելու առումով:
Օրաթերթի տնօրէն եւ գլխաւոր խմբագիր Շահան Գանտահարեան եւ սփիւռքահայ յայտնի մատենագէտ Արտաշէս Տէր Խաչատուրեանի որդիները` Տարօն ու Զարեհ Տէր Խաչատուրեանները, նախորդ տարի Ազգային գրադարանին յանձնած էին «Ազդակ»-ի թուայնացուած ամբողջ արխիւը: Շահան Գանտահարեան նշած է, որ թուայնացուած են ո՛չ միայն օրաթերթի մինչեւ այսօր հրատարակուած բոլոր թիւերը, այլեւ յաւելուածները, ինչ որ կարեւոր է սփիւռքի մէջ հրատարակուող իւրաքանչիւր թերթի համար: Թէժ կէտերու մէջ, ուր յաճախ վտանգուած է նաեւ թերթի թուայնացուած արխիւը, անոր անվտանգութեան մասին մտածելը ռազմավարական նշանակութիւն ունի, եւ ալ ո՞ւր պիտի պահպանուէր այդ արխիւը, եթէ ոչ Հայաստանի Ազգային գրադարանին մէջ: Շահան Գանտահարեան նշած է նաեւ, որ այդ առումով բեկումնային էր գրադարանին մէջ 28-29 նոյեմբեր 2019-ին տեղի ունեցած «Հայ մամուլի դերը ազգային արժեհամակարգի ձեւաւորման եւ պահպանման գործին մէջ. ընտանիք, հայրենիք, եկեղեցի» գիտաժողովը, քանի որ այդտեղ որոշուեցաւ կազմել «Ազդակ»-ի մատենագիտութիւնը, եւ գնահատելի է այն արհեստավարժ աշխատանքը, որ կը տարուի այդ ուղղութեամբ գրադարանին մէջ: Ըստ օրաթերթի խմբագիրին` «Ազդակ»-ի մատենագիտութեան կազմութիւնը հսկայական նշանակութիւն պիտի ունենայ յատկապէս սփիւռքի պատմութիւնը հետազօտողներուն համար:
Յուշագիրի ստորագրութենէն ետք կողմերը շնորհաւորեցին իրար` ընդգծելով, որ մեծ ճամբայ ունին միասին անցնելիք: